Do you know what happened when UIDAI tried to convince basanti’s mausi that Aadhaar was a good idea? In this Sholay remake, UIDAI plays Jai and Aadhaar is Veeru.

Mausi : Are UIDAI, bas itna samaz lo ke internet par privacy seene par pathhar ke sil ki tarah hoti hai. Bas desh ka data thoda secure ho jaaye to chain ki saans loo.
UIDAI : haa sach kaha mausi aapne. bada bojh hai aap par.
Mausi : Lekin beta, is bojh ko koi kunwe me to phaik nahi deta. Bura nahi maananaa , itna to poochhanaa hi padata hai ke Aadhaar ke peeche kaun hai uske lachhchhan kaise hai, logon ki privacy ki kya surakshaa hai?
UIDAI : Logon ke privacy ka to ye hai mausi.., ke ek baar privacy ki jimmedaari sar pe aa gayi to .. suraksha bhi karne lagegaa.
Mausi : To kya abhi kuch secure nahi rakhta?
UIDAI : Nahi nahi ye maine kab kahaa mausi, secure hai lekin… ab roj roj to database secure nahi ho sakataa na. .. kabhi leak bhi ho jaataa hai bechaaraa?
Mausi : leak ho jaata hai?
UIDAI : haan mausi ab ye kambakht breach cheej hi aisi hai ab mai kyaa kahoon ?
Mausi : heynnnn. to kya database breach ho gaya hai?
UIDAI : chhi chhi chhi chhi mausi, Aadhaar aur breach na na. woh to bahot hi secure aur hackproof database hai. Lekin mausi, ek baar kisine misuse kar liya to, asli-nakli ka kahaa track rahataa hai. Login karke access kara diya kisi ne paisa dene walon ko. Ab isme bechare Aadhaar ka kya dosh?
Mausi: Thik kahate ho beta. Leak hua woh misuse hua woh lekin, uska koi dosh nahi.
UIDAI : Mausi aap to mere Aadhaar ko galat samaz rahi hai. woh to itanaa secure aur hackproof hai. Aare privacy ki apeksha chodke to dekhiye, ye leak aur misuse ki khabarein to do din me band ho jaayegi.
Mausi : Arre beta, mujh budhiyaa ko samaza rahe ho. Ye breach aur leak ki jaankari kisi ki chupti hai aaj tak?
UIDAI : Mausi aap Aadhaar ko nahi jaanati , vishwaas kijiye wo is tarah kaa database nahi hai. Ek baar outrage band ho gaya to woh nakli admin accounts banana band kar degaa. bas, misuse apne aap ruk jaayega.
Mausi: Hai hai, bas yehi ek kami raha gayi thi. to kya koi admin aacounts bhi bana ke bech raha hai?
UIDAI : To isme kaunsi buri baat hai mausi. arre, admin login to facebook or twitter ke admins ke paas bhi hota hai, haan.
Mausi : Achchha ! to beta ye bhi bataate jaao ki tumhara yeh gunwaan database ka kaun kaun galat fayda uthaa raha hai?
UIDAI : Bas mausi, ye pataa chalate hi ham aap ko khabar de denge.
Mausi : Ek baat ki daad doongi beta. bhale sau buraaEyaa hai tumhare Aadhaar me ,phir bhi tumhare munh se us ke liye taareefe hi nikalti hai.
UIDAI : ab kya karoo mausi.. mera to dil hi kuchh aisa hai.(pause)… To.. mai ye rishtaa pakkaa samazoo?
Mausi : Pakkaa? bhale saari jindagi bina ID ke rehna pade lekin mai aise database ke haathon apni privacy kabhi nahi dungi. Democracy ki citizen hoon. koi gulaam nahi.
UIDAI : Ajeeb baat hai. mere itane samazaane par bhi aap ne inkaar kar diyaa.. Bechaaraa Aadhaar… naa jaane kya karega?


Vidyut

Vidyut is a commentator on socio-political issues with a keen understanding of tech and policy. She has been observing and commenting on Aadhaar since 2010 from a perspective of human rights, democracy and technological robustness.

1 Comment

Dr Bhardwaj K.S. · August 22, 2018 at 8:22 am

Interesting But Was Very Diffult To Read In Roman……………….

Leave a Reply

Your email address will not be published. Required fields are marked *